سچ بانی

سچ بانی تحریر: راجہ عدیل بھٹی

لوک گیت تے لوک داستاناں ساڈی تہذیب و ثقافت تے ساڈے رسم و رواج دا حصہ نیں تے بالخصوص پنڈاں چ اے گیت تے داستاناں زبان زدِ خاص و عام ہونڑیاں سن ‘ خورے انہاں لوک گیتاں تے لوک داستاناں نوں کس نی نظر کھا گئی اے کیوں جے اج ہر پاسے ہک نئی تہذیب تے ثقافت نے ڈیرہ جمایا ہویا اے ۔ جِدے چ اے لوک گیت تے لوک داستاناں گھٹ گھٹ کر مر رئے نے ۔ ایہہ گل بہوں افسوس تے دُکھ نال لخنی پے رئی اے کہ اسی سارے لوک خاص کری تے پنجاب نے لوکی انہاں لوک گیتاں تے لوک داستاناں نوں وساررئے آں ۔انہاں لوک گیتاں تے لوک داستاناں چ اساں نیاں پُرکھاں نی حالاتِ زندگی ‘ انہاں نے رسم و رواج‘ اس تہھرتی نال محبت‘ اس مٹی تے ہون آلے ظلم و جبر تے ایتھے دے وسنیکاں دی فکر تے سوچ لُکی ہوئی اے۔ بنیادی طور تے لوک گیت تے لوک کتھا زبانی ہوندے سن تے لوکی ہک دوجے نوں سناندے سن تے ایسے طراں ایہہ ورثہ سینہ بہ سینہ آون آلیاں نسلاں چ منتقل ہوندا رہیا اے ۔ پر کج ڈوہنگی سوچ رکھن آلے تے اس تہذیبی تے ثقافتی ورثہ نال محبت کرن آلیاں لوکاں انہاں لوک گیتاں تے لوک داستاناں نوں محفوظ کرن دی ٹھان کے انہاں نوں ادب دیاں وکھریاں وکھریاں صنفاں چ قلمبندکر دتا ۔ تاں جے آون آلیاں نسلاں انہاں لکھتاں توں نہ صرف سبق سکھن بلکہ انہاں نیاں سوچاں ناں محور ایہہ لوک گیت تے لوک کتھا بنن تے انہاں چ مزید تحقیق کر کے دوجیاںلئی نئے زاویے تے نئیاں راہواں کھول دین ۔ جس وچ اوہ بہوں کامیاب ہوئے نے تے انہاں مہان جوگ ہستیاں چ مسلماناں نے عظیم مفکر تے فلسفی شاعر حضرت ڈاکٹر علامہ محمد اقبالؒ نے دیس سیالکوٹ نال تعلق رکھنے آلے پنجابی دے مہان سیوک لکھاری تے وڈے شاعر احسان باجوا صاحب وی شامل نیں ۔ احسان باجوا نے ’’سچّ بانی‘‘ نی شکل چ ہک ایہو جئی اَن مُلی کتھا نوں ہیرے ‘ موتی تے جواہرات وانگوں مالا چ پرو کے آپنی فنی ‘ تخلیقی تے خدا داد صلاحیت نا ہک اچھوتا نمونہ پیش کیتا اے ۔ جدے چ او بہوں کامیاب نظر آؤندے نے ۔ نالے اُنہاں نے ایہہ مہان کتھا تخلیق کر کے پنجابی زبان نی بہوں وڈی سیوا کیتی اے ۔ ویسے تے ایہہ داستان (ہیر رانجھا) بہونواں شاعراں تے مصنفاں نے پیش کیتی اے تے خاص کری تے ایہہ داستان سیّد وارث شاہ نے ناں نال بہوں مشہور اے ۔ پر احسان باجوا ہوراں وی کج گھٹ نئیں کیتا ۔ خاص کری تے احسان باجوا ہوریں جس آلے اس داستان نے ہر بند نوں بند کردے نے تے لخدے نیں ’’آکھ احسانا سچیاں‘‘ تے اس داستان چ ہک نئی چاشنی تے ہک وکھرا ہی سواد پیدا ہو جاندا اے ۔ تے قاری ناں دِل اے پڑھ کے اس طراں دھڑکنا شروع ہو جاندا اے جیویں اے سارا کج خود اوہدے نال بیت رہیا اے تے او خود نوں وی اس داستان ناں ہک کردار سمجھ لیندا اے ۔ ایہو ہک سچے ‘ سُچے تے مہان ساہت کار تے دانشور نی پہچان ہوندی اے کہ اوہ قاری نوں آپنے ہی رنگ وچ رنگ جاندا اے تے قاری اوہدیاں اکھراں نی جادو نگری چ گم ہو کے آپنے آپ نوں وی ہک کردار سمجھ کے اوہدے چ شریک کر لیندا اے ۔ ساڈے پنجابی دے شاعر بابو ساجن (جنہاں ناں تعلق ضلع جہلم دی تحصیل دینہ شہر نال اے) ہوراں شاید ایہہ شعر احسان باجوا جئے مہان سیوک تے لکھاری لئی لخیا اے تے بابو ساجن ہوراں نی قلم کج اس طراں لخنی اے ۔ روز تخلیق شاہکار کدوں ہُندے نیں نِت ایسے پیدا فنکار کدوں ہُندے نیں احسان باجوا ہوراں نی ’’ سچ بانی‘‘ ناں چڑھاوہ ’’نبی پاکؐ ہوراں دے صحابی ناتھ جوگیاں دے سرتاج حضرت حاجی رتن ناتھ ہندیؓ ہوراں نوں‘‘ دے لئی اے ۔ پنجابی نی ہس خوبصورت ‘ سُندرتے اَن مُلی کتاب نُوں ’’سانجھ سویر‘‘ قلعہ صوبہ سنگھ (کالر والا) تحصیل پسرور ‘ سیالکوٹ ‘ پاکستان نے صدر چودھری عبدالرحمن بھلی آف سوداگر پورہ نے آپنی چھتر چھاویں چھپوایا اے ۔ مہان جوگ پنجابی سیوک احسان باجواہوراں نے ’’سچ بانی‘‘ بڑے خوبصورت تے دلکش عنواناں نال لخی اے تے عنوان کچ اس طراں نیں ،ربّ سوہنے دا جس، نبیؐ پاک ہوراں دا جس، مولا علی ؑ مشکل کشا دا جس ، نبیؐ دے یاراں دا جس ، حضرت امام حسینؑ ہوراں دا جس ، حضرت غوث الاعظمؒ ہوراں دا جس ، بابا فریدؒ شکر گنج ہوراں دا جس ، حضرت سیّد محمد ہاشم شاہؒ ہوراں دا جس ، ماں اللہ رکھیؒ سرکار پسرور والی دا جس، سائیں محمد صدیقؒ قادری خانانوالوی دا جس ، بابا نیامتؒ سائیں سرکار نارووال ، سائیں رخمتؒ سرکار کھوہی رحمت سائیں ہوراں دا جس ، سنت ہرنام سنگھ مہاراج دا جس ، اپنی جمن بھوں، پنجاب دا رنگ رُوپ ، پنجاب دے رُکھ بوٹے ، پندرھویں صدی عیسوی اندر پنجاب دی فصل واڑی، پنجاب دے چڑی جنور، پنجاب دا گھاہ بوٹ ، پنجاب دے دریا ، اپنے آپ نوں مت، کتھا ہیر رانجھا لکھن دا کارن ، قصہ ہیر رانجھا دے ہور لکھیار ، عشق دا بیان ، نفس دا بیان ، فقیری جیون ، رانجھیاں دا پچھوکڑ ، سیالاں دا پچھوکڑ ، بلوچاں دا پچھوکڑ ، مراد بلوچ دا جمن ، کھیڑیاں دا پچھوکڑ ، ڈیرہ ہیبت خان دا رنگ رُوپ ، بلوچاں دے اوٹھ ، بلوچاں دیاں بھیڈاں بکریاں ، شائستہ بانو سہتی، سہتی اُتے مراد بلوچ دے پیار دا مُڈھ، ہیر کہانی دے مُکھ پاتراں دیاں آپسی ساکا چاریاں ، صفت تخت حضار دی ، رنڈا ہو جان مگروں موجو دا حال ، موجدار خاں رانجھادی تیجے ویاہ بارے سوچ وچار اتے اوہدے پُتراں دا کوڑ وکھاون ، سلمان خان بلوچ دا یاری دی قدر کردیاں موجو نال اپنی بھین نسبت بانو دا ویاہ کر دین ، ویاہ مگروں نسبت بانو دی شریکے وچ ورت ویہار ، موجو دے تیجے ویاہ مگروں نونہاں پُتراں نوں ساڑا ، شاعر آکھی ، دھیدو دے جمن تے پیو نوں چا ، دھیدو دا عقیقہ ، دھیدو دا رنگ رُوپ ، پُتر جمن تے موجدار خاں دی نسبت بانو دی گل بات ، دھیدو دیاں بھیناں عاقلہ تے بختاوری دا دھیدو نوں لوریاں دین ، دھیدو دے جمن تے اوہدے بھراواں بھرجایاں نوں ساڑا ، جہے ہور بہوں سارے لازوال کے تے شاہکار عنوان موضوعِ سخن بنائے نیں۔ ایس گل مگروں احسان باجوہ ہوریں بہوں بہوں ودہائی تے خراجِ تحسین دے مستحق نیں۔ساڈھی سوہنے ربّ اگے دُعا اے کہ او احسان باجوہ اوراں نوں ماں بولی پنجابی دی ہور سیوا کرن دی توفیق بخشے تے او انج ای اپنے قلم نوں چلاندے رہن ۔ کیوں جے پنجابی زبان اساں پنجابیاں دی آن بان شان تے پہچان اے۔

Leave a Reply

Your email address will not be published. Required fields are marked *

*

Social Media Auto Publish Powered By : XYZScripts.com